ஓம் முருகா

ஓம் முருகா ஓம் முருகா ஓம் முருகா ஓம் 

                                ஓம்  முருகா ஓம் முருகா ஓம் முருகா ஓம் 

ஓம் முருகா ஓம் முருகா என்று கூறு - அந்த 

   உச்சிமலைக் கோயிலுக்குச் சென்று ஏறு .

கோமணத்து ஆண்டியை நீ பக்தியோடு - தினம் 

   கும்பிட்டுக்கொள் அதுவொன்றே பற்றுக் கோடு                       ( ஓம் முருகா )

கந்தனுக்கு பழனியில் படைவீடு - அதைக் 

   கொண்டுவர ஆசையுடன் நடைபோடு .

வந்ததுயர் ஓடிவிடும் அடியோடு - அவனை 

   வரச் சொல்லி பாடு ஒரு முடிவோடு.                                                 ( ஓம் முருகா )

ஆறுமுகன் பேரைச் சொல்லி ஆடிப்பாடு - அந்த 

   ஆறெழுத்து மந்திரத்தைப் படி ஆடு 

ஏறுமயில் ஏறிவரும் எழில் பாரு - மனதில் 

   ஏக்கமுடன் பழனிக்குச் சென்று சேரு .                                            ( ஓம் முருகா )  

வானுலகத் தேவனுக்கு வாழ்த்து பாடு - அந்த 

   வடிவேலன் புகழினை ஏத்தி ப்  பாடு 

ஆனைமுகன் தம்பியவன் அன்பைப் பாடு - அந்த 

   அண்ணாமலை பிள்ளையவன் அருள்தேடு                                 ( ஓம் முருகா )

வேல்முருகா என்றுசொல்லி மெட்டுப் போடு - அவனை 

   வேண்டுவதில்லை உனக்கென்ன தட்டுப்பாடு 

கால்வலிக்கும் தாங்கி நடை எட்டிப்போடு - அந்த 

   கந்தனை உன் பக்தியாலே கட்டிப்போடு  .                                   ( ஓம் முருகா )

கோலமயில் ஆடுது பார் ஜதியோடு - அதைக் 

   குகனிடம் தூதனுப்பி துதிபாடு 

வேலவனை தூக்கிக் கொண்டு வரச் சொல்லு - நாங்கள் 

   வேண்டும் வரம் அத்தனையும் தரச்  சொல்லு                            ( ஓம் முருகா )

துள்ளிவரும் வேலைக்கண்டு துதிபாடு - உன் 

   துன்பமெல்லாம் ஓடிவிடும் விதியோடு 

வள்ளிமண வாளனைநீ எண்ணிப் பாடு - அவனை

   வலைக்குள்ளே மாட்ட ஒரு கண்ணி  போடு                                  ( ஓம் முருகா )

கணபதி தம்பிஇடம் கனிவோடு - உன் 

   கவலைகள் சொல்லி விடு பணிவோடு 

மனம்விட்டுப்  பேசுசுப்ர மணியோடு - எந்த 

   மலையையும் மோதித் தள்ளு துணிவோடு                              ( ஓம் முருகா )

தந்தனத்தோம் பாட்டுச் சொல்லி தமிழோடு - ஞானத் 

   தங்க ரதத் தேரிழுப்பாய் மகிழ்வோடு 

செந்தூர்க் கடல் வீசுகின்ற அலையோடு - அந்த 

   செந்தில்வேலன் பேரைச் சொல்லி விளையாடு .                    ( ஓம் முருகா )

தக்கத்திமி தக்கத்திமி தாளம் போடு - அந்த 

   தண்டபாணி ஆற்றுக்கொரு பாலம் போடு 

பக்கத்துணை யாயிருப்பான் பயத்தை விடு -அவன் 

   பன்னிருகை கொண்டணைப்பான் கவலைவீடு                   ( ஓம் முருகா )

 

ஓம் முருகா ஓம் முருகா ஓம் முருகா ஓம் 

                                ஓம்  முருகா ஓம் முருகா ஓம் முருகா ஓம் 

                                                                                                                                 சிவகுமாரன் .

 

மன்றாடிப்பார்

குன்றெல்லாம் குடியாக உருவானவன் -கொஞ்சம்
 மன்றாடிப்பார் நேரில் வருவானவன்.
அன்றாடம் துதிப்போர்க்குள் இருப்பானவன் - தன்
 அடியாரை எதிர்ப்போர்க்கு நெருப்பானவன் -  முருகன் ( குன்றெல்லாம்...)     1.

உமைபாகன் நுதற்கண்ணில் உருவானவன் - அந்த
உலகாளும் தந்தைக்கே குருவானவன்  .
கேட்டாலே தரும் கல்ப தரு ஆனவன் -  நீ
கேட்டுப் பார் , எடுத்தள்ளித் தருவானவன் - முருகன் (குன்றெல்லாம்...)           2.

காட்டிடையன் போல்வேடம் தரித்தானவன்- சுட்ட
கனிஈந்து மணல்ஊதச் சிரித்தானவன்
திமிர்கொண்ட அசுரன் தோல் உரித்தானவன் - என்
தமிழுக்கும் அவனேதான்  உரித்தானவன் - முருகன் (குன்றெல்லாம்...)            3.


மலையேறி அரையாடை அணிந்தானவன் - பின்
மனம்மாறி கடுங்கோபம் தணிந்தானவன் .
குறவள்ளி தனைத்தேடி மணந்தானவன் - பொதிகைக்
குளிர்த் தென்றல் தமிழ்வீசும் மணம்தான்அவன்- முருகன்(குன்றெல்லாம்)   4.

திருஅருண கிரிநாவில் இருந்தானவன் - ஊமைக்
குருபரனின் பிணிதீர்க்கும் மருந்தானவன்.
புவிசுற்ற மயிலேறி பறந்தானவன் - என்
கவிகொத்திச் செல்கின்ற பருந்தானவன் - முருகன் (குன்றெல்லாம்)               5.

படைதன்னை வேல்கொண்டு பொடிசெய்தவன் - அசுரன்
பகைவென்று அதிற்  சேவற் கொடி செய்தவன் .
உலகெங்கும் தமிழ்நெஞ்சே குடி ஆனவன் - என்
உளம் உழுது பயிர் செய்யும் குடியானவன்  - முருகன் (குன்றெல்லாம்)            6.

அவ்வைக்குத் தமிழ் ஞானப் பழமானவன் -வள்ளி
அழகுக்கு மனம்மயங்கி கிழமானவன் -
உயர்வான வழிகாட்டும் மறை ஆனவன் - அவனை
உனக்குள்ளே தேடிப்பார் மறையான் அவன் - முருகன் (குன்றெல்லாம்)          7.

செந்தூரில் அலைவீசும் கடலானவன் -இன்பச்
செந்தமிழின் இசையே தன்  உடலானவன் -
குருப்ரம்மன்  சிறைவழக்கின் தீர்ப்பானவன் - உன்
குறைசொல்லிப் பார்அனைத்தும் தீர்ப்பான்அவன்-முருகன்(குன்றெல்லாம்)8

தெய்வானை வள்ளிக்கும் துணையானவன் -இன்பத்
தேன்தமிழின்  இன்சுவைக்கு இணையானவன் !
அடியாரின் விழி நீர்க்கு அணையானவன் - அவனை
அகல்விளக்காய் ஏற்றிப்பார் ,அணையான்அவன்-முருகன்(குன்றெல்லாம்) 9.

ஓங்கார நாதத்தின் பொருளானவன் - தினம்
ஓம் என்று சொல்லிப்பார் அருள்வான் அவன் .!
உலகத்தின் இருள்நீக்கும் ஒளி ஆனவன் - நீ
உளமுருகிக் கேள் எதையும் ஒளியான் அவன் - முருகன் (குன்றெல்லாம்)     10.


                                                      பிரபாகரனின் தெய்வீகக் குரலில் 

                                                        என் அம்மாவின் குரலில் 

சிவகுமாரன் 

அழைப்பாயா ?

பூசத் திருநாளில் பொற்பாதம் தேடிவர
ஆசை அதிகமுண்டு ஆறுமுகா- பாசமுடன்
என்னை அழைப்பாயா, ஏங்கித் துடிதுடித்து
உன்னைத் தொடரும் உயிர்.
                                            -சிவகுமாரன்

பரம்பொருளே

                                    வெண்பா 

நாடோடி வாழ்க்கையில் நானெங்கு போனாலும்
ஓடோடி வந்துநிற்கும் உன்னருளே  - ஈடேதும்
இல்லா பரம்பொருளே ! என்பயணம் சீராக்கி
நல்வழியில் என்னை நடத்து.
                                           
                                 சிவகுமாரன்.

லிங்கராஜா

         
                                     வெண்பா

திரிபுவ னேஸ்வரா லிங்கராஜா

உந்தன்
தரிசனம் காணத் தவித்தோம் - பரிவாய்
அழைத்தாய் உனதருள் ஆலயம், வாழ்வைத்
தழைத்திடச் செய்யுமுன் தாள்.

                                  -சிவகுமாரன்


ஒடிசா மாநிலம் புவனேஸ்வரில் லிங்கராஜா ஆலயம். திரிபுவனேஸ்வர்  என்றும் ஈசன் அழைக்கப் படுகிறார். மூவுலகங்களுக்கும் அதிபதி. 
அவன் அருளாலே அவன் தாள் வணங்கினேன்.

ஆடு விநாயகா

                       (வெண்பா)

ஆடுவி நாயகா! அல்லல் முறையிட்டு
பாடும் குரல்கேட்டும் பாராது - ஓடும்
துயரென்றார் உன்னைத் துதித்தாலே ! நானும்
அயராது கேட்பேன் அருள்.

                                          - சிவகுமாரன்

ஆண்டுதோறும் நடப்போம்.

பழனிமலை தணிகைமலை 

   பரங்குன்றம் சுவாமிமலை
அழகர்மலை செந்தூர் அலை எங்கும் - எங்க(ள்)
   ஆறுமுகா உந்தன் அருள் பொங்கும்.

பார்வதியின் வேலெடுத்து 

   பகைவெல்ல  சூளுரைத்து
சூரர்குலம் வேரறுத்துக் கொன்றாய்-அந்தச்
   சூரனையும் சேவலாக்கி நின்றாய்.

சுட்டபழம் கேட்ட அவ்வை
   செந்தமிழில் நீ மயங்கி
இட்டமுடன் நாவல்கனி பறித்தாய்- அதை
   எடுத்தவள் மணல் ஊதச் சிரித்தாய்.

கண்ணில் காதல் கொப்பளிக்க
   கணபதி ஒத்துழைக்க
கன்னிமானைத் தேடுவதாய் துரத்தி - நீயும் 

   கவர்ந்திட்டாய் மயங்கினாள் குறத்தி.

புள்ளிமானைத் தேடிக்கிட்டு 

   பொறுப்பின்றி மெனக்கெட்டு

வள்ளி பின்னே சுத்தி நீயும் திரிந்தால் - உன்னை
   வையப் போறார் அப்பனுக்குத் தெரிந்தால். ...

வேதகுரு பிரம்மனையே
   வேதத்திற்குப் பொருள்கேட்டு
சோதித்தது போதுமடா குறும்பா-எம்மைச்
   சோதித்திட உந்தன் மனம் இரும்பா?

அத்தனுக்கேப்  பிரணவத்தின்

   அரும்பொருள் சொல்லிவைத்த 

புத்திரனே ஞானஸ்கந்த குருவே - எங்கள் 

   புத்தியெல்லாம் உந்தன் எழில் உருவே,

அப்பன் மேலே கோச்சுக்கிட்டு 

   ஆண்டிக்கோலம் பூண்டுக்கிட்டு
தப்புசெய்ய வேணாமய்யா கந்தா- உன்னைத்
   தாங்கிக்குவோம் கீழிறங்கி வந்தா

உச்சிமலை ஏறிக்கிட்டு 

   ஒய்யாரமா நின்னுக்கிட்டு
பச்சபுள்ள பேலெதுக்கு ஆட்டம்? - உன்னைப்
   பாக்க இங்க காத்திருக்கு கூட்டம்.

கோவணத்தக் கட்டிக்கிட்டு 

   குன்றின்மேலே ஏறிக்கிட்டு
தேவையில்லை இந்தக் கோபம் முருகா - எங்கள்
   தேவையெல்லாம் தீர்க்க ஓடி வருவாய்.

ஆறுபடை வீடு நோக்கி 

    ஆறுதலைத் தேடி வந்தோம் 

ஆறுதலைக் கொண்ட எங்கள் சாமி- நீயும் 

   ஆசைமுகம் ஆறிலொன்றைக் காமி. 

கந்தா உன்னைப் பாடிக்கொண்டு

   கால்வலிக்க ஓடிக்கொண்டு
வந்து நின்றோம் உந்தன் வாசல் தேடி - நீயும்
   வழங்கிட வேணும் அருள் கோடி

கால்வலியைத் தாங்கிக்கிட்டு 

   கண்டதையும் தின்னுக்கிட்டு

வேல்முருகா உன்னைக் காண வந்தோம் - எங்க(ள்)
   வேண்டுதலை உன்னிடத்தில் தந்தோம்.

சொந்தவேலை விட்டுப்புட்டு

   சொந்தங்களைக் கூட்டிக்கிட்டு

கந்தா உன்னைக் காண ஓடி வாரோம்- நீயும்
   கண்டுக்காட்டி என்ன செய்யப் போறோம்?

வேலையெல்லாம் தள்ளிவச்சு  

   வேலை மட்டும் நெஞ்சில் வச்சு
வேலவனைக் காண இந்த ஓட்டம் -இப்ப
   வேறெதிலும் இல்லை எங்கள் நாட்டம்.

வெயில்,பனி பார்க்கவில்லை 

   வெட்டிப்பேச்சு பேசவில்லை 

மயிலோனே நீதான் எங்கள் எண்ணம் - உந்தன் 

   மனதையும் வெல்வோம் அது திண்ணம் .

   

கார்த்திகேயா உன்னை நாங்கள்
   கால்வலிக்கத் தேடிவந்து
பார்த்தவுடன் போகும் வலி பறந்து- எம்மை
   பார்த்துவிடு பன்னிருகண் திறந்து.

பாலசுப்ர மணியனே 

   பார்வதியின் பாலகனே

காலமெல்லாம் உன்னைப் பாடிக் கிடப்போம் - உன்னைக்
   கண்டுவர ஆண்டுதோறும் நடப்போம்.

தண்டாயுத பாணி உன்னைத்
   தமிழ்கொண்டு பாடுதல்போல்
உண்டோ வேறு இன்பங்களும் எமக்கு- இதில்
   உண்மை சொல்லு இஷ்டம் தானே உமக்கு(ம்)?

கண்ணு ரெண்டும் பூத்துப் போச்சு
   காலு கையி வேத்துப் போச்சு
ஒண்ணுமில்லை எமக்கிந்த வாட்டம்  -நாங்க
   உன்னை சும்மா விட்டு விட மாட்டோம்.

-சிவகுமாரன் 

 என்னை எழுத வைத்ததும் , என் தம்பி பிரபுவை பாட வைத்ததும்

 அந்த அழகன் முருகனே.